raim

Raim, m. monosyllab. Qu'aucuns escrivent par n, Rain, comme aussi on le prononce, Semble descendre de Ramus Latin et qu'il signifie Rameau. Toutesfois il se trouve en des vieilles notes de notaires de l'an mil quatre cens, qu'en ce temps la, en matiere de desemparement ou devest et saisissement, ou vest de choses immeubles, ils usoyent és lettres de vendition de ceste clause, S'est dessaisy et desvestu et desmis en nostre main, comme en main de justice, par Raim de baston pour et au profit dudit acheteur, ce qui monstre que Raim a autre signification que de Rameau, et usoit on en cela dudit raim de baston, tout ainsi comme en l'investiture d'un fief, on usoit d'une courte lance ou javeline, que le seigneur faisant ladite investiture mettoit au poing de son futur vassal, comme est recité au chapitre, Quid sit inuestitura, Au 2. livre Des fiefs. Ainsi en la coustume du baillage de Vermandois au chap. de saisine et dessaisine, appelez vest et devest, art. 126. est escrit: Et se fait communément ladite vesture par tradition d'un petit baston ou buchete.

Thresor de la langue françoyse. Jean Nicot.